Олунньу ый бүтүүтэ Хатыы орто оскуолата уонна улуустааҕы эппиэкэ отделын көҕүлээһининэн ‘’ Сылаас илиигэ бигэнэн’’ эппиэкэҕэ сылдьар оҕолор эппэкииннэригэр уонна тулаайах оҕолору дьиэ кэргэҥҥэ иитиигэ ылбыт төрөппүттэр кыттыылаах форум буолан ааста. Улууска 126 оҕо эппиэкэҕэ сылдьар, онтон 21 оҕо алта дьиэ кэргэҥҥэ иитиллэр. Атыттара эппэкииннэргэ сылдьаллар. Мэҥэдьэк нэһилиэгэр 14 оҕо эппиэкэҕэ баар, олор истэригэр 10 оҕо икки дьиэ кэргэҥҥэ иитиллэр. Тэрээһиҥҥэ барыта 67 киһи, эппэкииннэр, 4 оҕону иитэр дьиэ кэргэн, соцпедагогтар, дириэктэри иитэр үлэҕэ солбуйааччылар, улуустааҕы үөрэҕирии управлениета,
улуустааҕы эппиэкэҕэ уонна саастарын ситэ илик оҕолор, кыаммат дьон бырааптарын көмүскүүр отдел кылаабынай исписэлииһэ Валентина Халанникова, исписэлиистэр Валерия Алексеева, Ольга Андреева кытыннылар. Оскуола үлэһиттэрэ кэлбит ыалдьыттары сахалыы итии чэйинэн, сылаас алаадьынан көрүстүлэр. Күн бастакы аҥарыгар Хатыы нэһилиэгин киэн туттар дьиэ кэргэнэ Ирина Ивановна уонна Алексей Сергеевич Васильевтар, Архиповтар, Федотовтар, Михеевтар иитэ сылдьар оҕолорунаан маастар кылаас ыытаннар ыалдьыттары сөхтөрдүлэр. Ол кэннэ санаа атастаһыылаах төгүрүк остуол буолла. Манна Мария Ивановна » Оҕону иитэ ылбыт ыал адаптацията», Надежда Ивановна » Оскуолаҕа киириэн иннинээҕи саастаах оҕо адаптациятын ааһыытын», Ирина Ивановна » Оҕону сайыннарыы», Оксана Алексеевна «Сүбэлэр, сүбэлэр» диэн тиэмэлэринэн бэйэлэрэ ааспыт кэрдиис кэмнэрин кэпсээн дьон уйулҕатын таарыйдылар.